“Ҳудудгаз Хоразм” газ таъминоти филиалида ҳам  бу борада ишлар самарали ташкил этилган. Буни биз “Янгибозортумангаз” газ таъминоти бўлимида 6864 та аҳоли хонадонига суюлтирилган газни узлуксиз етказиб бериш бўйича амалга оширилаётган  ишлар мисолида ҳам кўришимиз мумкин.Туманда “зангори ёқилғи”нинг ушбу тури истеъмолчиларга “айланма” усулда график асосида тарқатилмоқда. Истеъмолчидан газдан бўшаган баллон олиниб ўрнига тўлдирилгани берилмоқда.Кўрилган чора-тадбирлар самараси ўлароқ жорий йилнинг 7 ойида истеъмолчиларга 592 тонна ўрнига қарийб 629 тонна ушбу маҳсулот етказиб  берилиб режа 106 фоизга бажарилди.

        Маълумки,суюлтирилган газдан фойдаланиш истеъмолчилардан муайян ҳавфсизлик қоидаларига амал қилишни талаб қилади. Бу  ҳақиқатни, афсуски, кимдир билмайди яна кимдир унутиб қўяди. Шу сабабдан ҳам, газ таъминоти бўлими ходимлари томонидан  бу юзадан кенг миқёсда аҳоли ўртасида тушунтириш ишлари  олиб борилмоқда. Истеъмолчиларга барча ҳавфсизлик қоидалари ёритилган эслатма-буклетлар тарқатилмоқда. Айниқса, газ баллонини қоидаларга риоя қилмаган ҳолда ўрнатиш, носозлик сезилганда уни билиб-билмасдан таъмирлашга уриниш мудҳиш ҳолатларга олиб келиши мумкинлиги аҳолига етказилмоқда. Шу билан бирга, яқинда  “Ҳудудгазтаъминот” АЖ  барча туман газ таъминоти бўлимларида бўлгани каби Янгибозор туманида ҳам   суюлтирилган газ тўлдирилган маиший газ баллонларини аҳоли хонадонларига ўрнатиш ва алмаштириш бўйича чилангар штати жорий этилганлиги айни муддао бўлди.

      Эндиликда мутахассис томонидан ҳавфсизлик қоидаларига тўла амал қилган ҳолда, суюлтирилган газ баллони хонадонларга тасдиқланган тўлов - 3000 сўм эвазига ўрнатилмоқда. “Янгибозортумангаз” газ таъминоти бўлими суюлтирилган газ етказиб бериш бўйича етакчи муҳандиси Жасурбек Жуманиёзовнинг таъкидлашича,бу янгилик иш самарадорлигини оширишда ҳам муҳим аҳамият касб этмоқда. Чунки, илгари суюлтирилган газ баллонларини бевосита аҳоли хонадонларига етказиб бериш жараёнида икки киши қатнашган бўлса, ҳозирда уч киши иштирок этмоқда.

“Ҳудудгаз Хоразм” газ таъминоти филиали матбуот хизмати

Август 30, 2020
Муҳаррир:
Кўришлар сони: 947 марта